Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə noyabrın 20-də Mərakeşə səfərə yola düşür.
İslamazeri.com xəbər verir ki, QMİ-nin mətbuat xidmətindən bildirilib ki, səfərin məqsədi noyabrın 22-23-də Mərakeş Krallığının Fəs şəhərində keçirilməsi planlaşdırılan Birləşmiş Millətlər Təşkilatının Sivilizasiyalar Alyansının (UNAOC) IX Qlobal Forumunda iştirak etməkdir.
BMT Sivilizasiyalar Alyansının, Mərakeş Krallığının və Nizami Gəncəvi Beynəlxalq Mərkəzinin həmtəşkilatçılığı ilə keçirilən Fəs Qlobal Forumunun mövzusu “Sülh alyansına doğru: Vahid bəşəriyyət olaraq birlikdə yaşamaq”dır. Birləşmiş Millətlər Təşkilatının Baş katibinin, Mərakeş Kralı VI Məhəmmədin də iştirak edəcəkləri foruma dəvət alan Şeyxülislam Allahşükür Paşazadə tədbirin nüfuzlu dövlət xadimlərinin yer aldığı ilk hissəsində - “Müdriklərin səsi” bölümündə çıxış edəcək.
Dünyanın tanınmış siyasi, elm, din və ictimaiyyət xadimlərinin iştirak edəcəkləri Forumda qlobal kontekstdə aktual əhəmiyyət kəsb edən bir çox mövzuların, o cümlədən zorakı ekstremizm, terrorizm, nifrət çağırışları, dini liderlərin, qadınların və gənclərin rolu, təhsil, qlobal vətəndaşlıq, çoxtərəflilik və digər məsələlər barədə fikir mübadiləsi nəzərdə tutulur. Forum iştirakçıları qarşılıqlı hörmət, bir-birini qəbuletmə, birgəyaşayış, dinlərarası, mədəniyyətlərarası və sivilizasiyalararası dialoqa əsaslanan, sülhə, birliyə və həmrəyliyə aparan yolları müzakirə edəcəklər.
Qafqaz Müsəlmanları İdarəsi sədrinin Forum çərçivəsində tədbirlərdə iştirakı və görüşləri nəzərdə tutulur.
