Çin səfiri İranlı generala J20 qırıcı maketi verməklə ABŞ-a nə mesajı verdi?
İslamazeri.com xəbər verir ki, Tehranda fəaliyyət göstərən xarici ölkələrin hərbi attaşeləri İran Hərbi Hava Qüvvələrinin komandanı briqada generalı Bəhmən Behmərd ilə görüş keçiriblər. Görüş Hərbi Hava Qüvvələri Günü və İran HHQ şəxsi heyətinin mərhum İmam Xomeyniyə sədaqətinin anılması münasibətilə təşkil olunub.
Mərasim zamanı Çinin hərbi attaşesi İran HHQ komandanına J-20 beşinci nəsil qırıcı təyyarəsinin maketini təqdim edib.
J-20 hazırda dünyanın ən məxfi və qabaqcıl döyüş platformalarından biri hesab olunur və rəsmi olaraq ixrac edilmədiyi bildirilir.
Bununla belə, təqdimatın açıq mərasim şəraitində və yüksək rütbəli hərbi rəhbərliyə edilməsi diqqət çəkən məqam kimi qiymətləndirilir.
Rəsmi açıqlamalarda jestin məzmunu ilə bağlı əlavə detallar verilməyib.
Hərbi diplomatiyada bu cür maket təqdimatları çox vaxt simvolik mesaj daşıyır və konkret proseslərə işarə kimi qəbul olunur.
Xüsusilə söhbət beşinci nəsil və gizli texnologiyalara malik platformadan gedirsə, jestin təsadüfi olduğu fikri zəifləyir.
Məlumatın məhdud saxlanılması və detallardan yayınma ehtimal olunan əməkdaşlığın qapalı mərhələdə aparıldığına dair suallar yaradır.
Birbaşa silah təhvili barədə rəsmi təsdiq olmasa da, bəzi hərbi müşahidəçilər jesti artıq reallaşmış və ya yekunlaşmaq üzrə olan prosesin vizual işarəsi kimi dəyərləndirirlər.
Bu kontekstdə təqdimat regiondakı hava balansının səssiz şəkildə yenidən formalaşdığına dair mesaj kimi oxuna bilər.
