ABŞ-ın və İsrailin Yaxın Şərqdəki təcavüzkar siyasəti bütün dünyanı yeni bir fəlakətin astanasına gətirərkən, İspaniyadan Vaşinqton administrasiyasına tarixi bir etiraz bildirilib.
İslamazeri.com xəbər verir ki, İspaniyanın Baş naziri Pedro Sançez, Əndəlüs bölgəsindəki hərbi bazaların İrana qarşı əməliyyatlar üçün istifadəsinə icazə vermədiyinə görə onu hədəf alan ABŞ Prezidenti Donald Trampı sərt şəkildə tənqid edib.
Madriddəki Monkloa Baş nazirinin iqamətgahında kameralara danışan Sançez, Trampın ehtiyatsız açıqlamalarına onun adını çəkmədən cavab verib.
İspaniyanın mövqeyinin aydın olduğunu bildirən Sançez deyib: "İspaniyanın mövqeyi aydındır. Bu, Ukrayna və Qəzzada olduğu kimidir. Beynəlxalq hüququn pozulmasına yox. Dünyadakı problemlər sadəcə bomba atmaqla həll edilə bilməz. Keçmiş səhvlər təkrarlanmamalıdır. Mövqeyimizin xülasəsi budur: müharibəyə yox".
Keçmişdə ABŞ-ın dağıdıcı müdaxilələrini və İslam dünyasında qoyduğu qanlı izləri xatırladan Sançez, İraqa hücumu nümunə olaraq göstərərək tarixi bir xəbərdarlıq edib.
İllər əvvəl İraqda demokratiya və sülh gətirmək adı altında başlayan müharibənin dünyaya yalnız terrorizm, göz yaşları, qaçqın axını və iqtisadi böhran gətirdiyini vurğulayan İspaniya Baş naziri bildirib: “Tarixdən dərs çıxarmalıyıq. Milyonlarla insanın həyatı ilə rus ruleti oynamamalıyıq. 23 il əvvəl ABŞ hökuməti bizi İraqla müharibəyə sürüklədi. Bu müharibənin məqsədi Səddam Hüseynin nüvə silahlarını aradan qaldırmaq və demokratiya gətirmək idi. Lakin İraqda nüvə silahı tapılmadı. Bizi iki dəfə aldada bilməzsiniz!”
Sançez əlavə edib ki, ABŞ və İsrailin aqressiv mövqeyinin dünyanı hara apardığını təxmin etmək mümkün deyil və xəbərdarlıq edib: “Hətta təcavüzkar olanlar da nə istədiklərini bilmirlər. Bölgəyə və digər ölkələrə yayıla biləcək və qlobal iqtisadi nəticələrə səbəb ola biləcək bir müharibəyə girmək riski var”.
Məlum olduğu kimi, ABŞ prezidenti Donald Tramp 3 martda Oval Ofisdə Almaniya kansleri Fridrix Merts ilə görüşündə açıq şəkildə İspaniyanı hədəfə alıb.
Sevilya və Kadizdəki Moron de la Frontera və Rota hərbi bazalarının istifadəsinə icazə verməyən İspaniyaya qarşı həddindən artıq açıqlamalar verən Tramp, "İstəsək, onların bazalarından istifadə edə bilərik. Heç kim bizə onlardan istifadə etməməyimizi deyə bilməz. Mən onlara İspaniya ilə bütün ticarət əlaqələrini kəsmələrini tapşırmışam" deyərək təhdid edib.
Baş nazir Sançez, müharibə təbillərini döyənlərin əsl niyyətlərinə diqqət çəkərək, həllin silahda deyil, diplomatiyada və siyasətdə axtarılmalı olduğunu vurğulayıb.
Günahsız insanların yenidən mümkün müharibənin bədəlini ödəyəcəyini bildirən Sançez, çıxışını belə yekunlaşdırıb:
"Maaşlar artmayacaq, ekoloji problemlər də həll olunmayacaq. Neft və qaz qiymətləri artacaq. Siyasətçilər olaraq, biz burada insanların problemlərini həll etmək üçün varıq, onları daha da pisləşdirmək üçün deyil. Bəzilərinin və ya həmişə eyni insanların ciblərini doldurmaq üçün deyil."
Madrid hökuməti İspaniya vətəndaşlarının bölgədən təxliyəsi səylərinin həssaslıqla həyata keçirildiyini bildirib və Qəzzadakı soyqırımı və Ukraynadakı münaqişəyə toxunaraq, Fələstinin unudulmaması üçün beynəlxalq hüquqa riayət etməyə davam edəcəkləri mesajını çatdırıb.
Digər tərəfdən, İspaniya lideri Sançez İspaniyanın NATO, Avropa Birliyi (AB), Birləşmiş Millətlər Təşkilatı və beynəlxalq birliyin tamhüquqlu üzvü olduğunu və hökumətinin bu günə qədər etdiyi kimi, Yaxın Şərqdəki bütün ölkələr və AB-dəki müttəfiqləri ilə dialoqu davam etdirərək sülhü və beynəlxalq hüququ müdafiə etməyə davam edəcəyini bildirib.
