Pezeşkian müdafiə və təhlükəsizlik bürokratiyasında kritik bir addım ataraq admiral Əli Şəmxanini Milli Müdafiə Şurasının katibi vəzifəsinə təyin edib.
İslamazeri.com xəbər verir ki, İran mediasında cümə axşamı axşamı yayılan məlumatlara görə, Prezident Məsud Pezeşkian müdafiə və təhlükəsizlik bürokratiyasında kritik bir addım ataraq admiral Əli Şəmxanini Milli Müdafiə Şurasının katibi vəzifəsinə təyin edib.
Təyin olunan şəxs Əli Şəmxani, İranın müasir hərbi və siyasi tarixində simvolik fiqur hesab olunur.
Hazırda İslam İnqilabının Rəhbəri Ayətullah Xameneinin müşaviri olan Şəmxani, keçmişdə Müdafiə naziri və Ali Milli Təhlükəsizlik Şurasının katibi kimi ən kritik vəzifələrdə çalışıb.
Həm nizami ordu, həm də İnqilab Keşikçiləri Korpusu tərkibində dərin izlər qoymuş Şemxaninin bu vəzifəyə gətirilməsi, İranın müdafiə doktrinasında “təcrübə və qətiyyət” mesajı kimi qiymətləndirilir.
İran Milli Müdafiə Şurası
İran Milli Müdafiə Şurası tarixi arxa plana malikdir. Şura, 2025-ci ilin iyun ayında ABŞ və İsrail tərəfindən İrana qarşı həyata keçirilən hücumlardan sonra, 3 avqust 2025-ci il tarixində rəsmi olaraq təsis edilib.
Birbaşa Prezidentin sədrliyi ilə fəaliyyət göstərən bu ali struktur; qanunverici, icraedici və məhkəmə hakimiyyətlərinin rəhbərlərini, eləcə də silahlı qüvvələrin komandanlıq heyətini və aidiyyəti nazirləri bir araya gətirir.
Əl-Məyadin kanalının məlumatına görə, yüksək səviyyəli koordinasiya mərkəzi kimi formalaşdırılan şuranın əsas vəzifəsi müdafiə planlarını diqqətlə araşdırmaq, regional və qlobal miqyasda ortaya çıxan yeni nəsil təhdidlərlə mübarizə aparmaqdır.
Qərar qəbuletmə proseslərində bürokratik ləngiməni aradan qaldırmağı və koordinasiya səviyyəsini ən yüksək həddə çatdırmağı hədəfləyən bu struktur, eyni zamanda silahlı qüvvələrin imkanlarının strateji fokusla inkişaf etdirilməsinə cavabdehdir.
