Muxtarın qiyamı, rəhbərliyi və şəhadəti...
İslamazeri.com xəbər verir ki, tarixin yaddaşında Əhli-beyt intiqamçısı kimi qalan Muxtar ibn Əbi Übeydə Səqəfi, hicri 67-ci ilin Ramazan ayının 14-də şəhadətə çatmışdır. Onun həyatı və mübarizəsi İslam tarixinin ən təlatümlü dövrlərindən birinə təsadüf edir.
Kufə Zindanından Qiyamın rəhbərliyinə
Muxtar Səqəfi Kufənin nüfuzlu şəxslərindən biri idi. İmam Hüseyn və Müslüm ibn Əqili müdafiə etdiyi üçün Übeydullah ibn Ziyad tərəfindən həbs edilmişdi. Aşura günü o zindanda idi. Bacısının həyat yoldaşının vasitəçiliyi ilə azad olduqdan sonra İmam Hüseynin intiqamını almaq üçün Kufədə qiyam etdi. Kufədə 18 ay hakimiyyətdə olduğu dövrdə İmam Hüseynin qatillərini cəzalandırdı.
Mühasirə və Şəhadət
Bəsrə hakimi Musib ibn Zübeyr böyük bir qoşunla Kufəyə hücum etdi. Nəhayət Muxtarın qoşunu məğlub oldu. Kufə qəsrində mühasirəyə alınan Muxtar Səqəfi, hicri 67-ci ilin 14 Ramazanında şəhid oldu. Mənbə: Feyzül-üllam s. 33, Vəqeyeül-əyyam s. 39.
Sədaqət Rəmzi: Ümrə binti Nomanın Şücaəti
Muxtarın şəhadətindən sonra Musib ibn Zübeyr onun həyat yoldaşı Ümrə binti Noman ibn Bəşir Ənsarini həbs etdirdi. Musib ondan ərindən uzaq olduğunu bildirməyi tələb etdikdə, Ümrə xanım bildirdi ki, o, qanını Allah və Peyğəmbər yolunda qurban etdi və Peyğəmbər övladının intiqamını aldı.
Buna görə də onu ölümlə hədələdilər. Muxtarın həyat yoldaşı cavab verdi ki, bu ölümdən sonra cənnət var və Əli ibn Əbu Talibin məhəbbətini heç bir şeylə dəyişməz. Bu sədaqətinə görə Ümrə xanım şəhid edildi. Mənbə: Əl-Muxtarüs-səqəfi s. 45.
