Rəsmi Tehran: Gərginliyin artması ABŞ üçün daha böyük itkilərə səbəb olacaq
İslamazeri.com xəbər verir ki, İran İnqilab Keşikçiləri Korpusunun siyasi köməkçisi briqada generalı Cavani Hörmüz boğazında yeni idarəetmə yanaşması hədəflədiklərini və icazəsiz keçidlərə müdaxilə edəcəklərini bildirib.
Dövlət televiziyasında yayımlanan xüsusi xəbər proqramında çıxış edən briqada generalı Cavani deyib: “Bu bölgədə təyin olunmuş xətlərdən keçmək istəyən hər hansı bir gəmi təhlükəsizliyini təmin etmək üçün İran İslam Respublikası Silahlı Qüvvələrindən icazə almalıdır”.
O, əlavə edib: “Biz bu böyük nemətə görə minnətdarlığın praktik ifadəsi olaraq Hörmüz boğazını idarə etməyi hədəfləyirik” və daha sonra bildirib: “Hörmüz boğazının yeni idarə olunması qlobal və beynəlxalq nizamın əsasını təşkil edəcək”.
Briqada generalı Cavani vurğulayıb: “Düşmən və düşmən qüvvələrə məxsus hər hansı bir gəmi keçməyə cəhd edərsə, qətiyyətlə müdaxilə ediləcək”.
Bəyanatının digər bir hissəsində o, ABŞ ilə İran arasında artan gərginliyin ABŞ üçün daha böyük itkilərə səbəb olacağını bildirib.
Briqada generalı Cavani bildirib ki, “ABŞ öz gücünü sınayır və bütün imkanlarını tətbiq edir, amma sonda uğursuz olacaq”.
O əlavə edib ki, “Bu gün Trampın problemi Hörmüz boğazının yenidən açılmasıdır. O, 40 günlük müharibə zamanı və sonrasında hər yolu sınadı, amma buna nail ola bilmədi”. Briqada generalı Cavani əlavə edib ki, “Tramp heç bir şəkildə vəziyyəti 28 fevraldan əvvəlki dövrə qaytara və şərtləri dəyişə bilməz”.
