"Əl-Əxbar" qəzeti ABŞ-ın Livan prezidenti Cozef Aun və ABŞ prezidenti Donald Tramp arasında bu gün keçirilməsi planlaşdırılan görüşdən əvvəl Livan üçün yeni təhlükəsizlik planını təqdim edəcəyini bildirib.
İslamazeri.com xəbər verir ki, qəzetin Beyrutdakı ABŞ diplomatik mənbələrinə istinadən verdiyi məlumata görə, Aun Trampdan "İsrailin Livandan tamamilə çıxarılmasına zəmanət verən öhdəlik" eşitməyi gözləyir.
Əvəzində Trampın Livan hökumətindən Hizbullahın ölkə daxilində hərbi mövcudluğuna son qoymaq üçün "aydın bir öhdəlik" tələb etməsi gözlənilir.
Məruzədə həmçinin bildirilir ki, ABŞ prezidenti Aundan Hizbullah məsələsinin həllində HTŞ lideri əl-Colani ilə əməkdaşlıq etməsini xahiş edəcək və Vaşinqtonun bu prosesdə fəal iştirakını vurğulayacaq.
"Əl-Əxbar" yazıb ki, Aunun Vaşinqton səfərinin uğuru görüşlərin sayı və ya ABŞ-dan dəstək bəyanatları ilə deyil, bu vədlərin Livan üçün konkret siyasi və təhlükəsizlik qazanclarına çevrilib-çevrilməməsi ilə ölçüləcək.
Qəzetin məlumatına görə, ABŞ rejimi Livana kömək etməyə hazır olduğunu desə də, faktiki dəstəyini silahların yalnız dövlətin əlində cəmləşməsi şərti ilə bağlayır. Buna görə də, əsas sual Aunun bu güzəşt müqabilində Vaşinqtondan hər hansı real siyasi və təhlükəsizlik qazancları əldə edib-etməyəcəyidir.
