İran Ali Rəhbərinin beynəlxalq məsələlər üzrə müşaviri Əli Əkbər Vilayəti Hörmüz boğazının tamamilə ölkəsinin suverenliyi altında olduğunu bəyan edib.
İslamazeri.com xəbər verir ki, Vilayəti boğazın istifadəsinə dair təklif edilən alternativ marşrutları kəskin tənqid edərək, bunu "milli sərvətin hərraca çıxarılması" kimi qiymətləndirib.
İranın yüksək rütbəli rəsmisi Əliəkbər Vilayəti Hörmüz boğazının statusu ilə bağlı mühüm bəyanatlarla çıxış edib. Müşavir dünyada heç bir gücün bu strateji su keçidini İranın suverenliyindən çıxara bilməyəcəyini vurğulayıb.
Alternativ marşrut təkliflərinə sərt etiraz
Gəmilərin Hörmüz boğazından gediş-gəliş marşrutunun bir hissəsinin Oman sahillərinə yaxın sulardan keçirilməsinə dair irəli sürülən təkliflərə toxunan Vilayəti bunun qəbulolunmaz olduğunu bildirib. O qeyd edib ki, bu cür ideyalar İranın ən mühüm milli nailiyyətlərindən birini rəsmi Tehranın ziyanına olaraq bazarlıq mövzusuna çevirmək cəhdidir.
Vilayəti vurğulayıb ki, Hörmüz boğazı "40 günlük müharibədən" sonra tam şəkildə İranın suverenliyinə keçib və ölkədəki heç bir rəsmi şəxs xalqın və rəhbərliyin iradəsini təmsil etmədən bu milli varlıq üzərində güzəşt təəssüratı yaradan bəyanatlar verməməlidir.
Bölgədəki tarixi rol və İngiltərə amili
Çıxışında regionun tarixinə də toxunan müşavir, İranın tarix boyu qonşu Omanın müstəqilliyinə və hökumətinə dəstək verdiyini xatırladıb:
"Şah Abbas dövründə portuqallar Fars körfəzindən qovulmuş və Maskat yenidən Oman rəhbərliyinə qaytarılmışdır. Eyni şəkildə, Nadir şah da Nəcddən gələn qüvvələrin işğal etdiyi Maskatı azad edərək Oman hökmdarına təhvil vermişdir."
Böyük Britaniyanın regiondakı tarixi rolunu da tənqid edən Vilayəti, Süveyş kanalının milliləşdirilməsi və Camal Əbdülnasirin mübarizəsindən sonra Britaniya imperiyasının tənəzzülə uğradığını diqqətə çatdırıb. Onun sözlərinə görə, London hazırda bölgədə müstəqil güc deyil və yalnız ABŞ-nin xarici siyasət xəttini izləyir.
