Ayətullah Məkarim Şirazi bildirib ki, əgər elmi hövzə virtual məkanın səhvləri və çirklənmələrinin təsiri altına düşərsə, bu, çox ciddi təhlükə yaradar.
İslamazeri.com-un xəbərinə görə, Ayətullah Məkarim Şirazi vurğulayıb ki, ilk növbədə hövzə qorunmalı, daha sonra onun vasitəsilə cəmiyyətin islahına çalışılmalıdır.
Mərcəi təqlid Milli Virtual Məkan Mərkəzinin rəhbəri və üzvləri ilə görüşdə virtual məkanın mahiyyəti və funksiyalarına toxunaraq, onu müasir dövrün ən mühüm və təsirli məsələlərindən biri adlandırıb. O, virtual məkanın dəqiq tanınmasının, ağıllı şəkildə idarə olunmasının və onun zərərli tərəfləri ilə mübarizənin vacibliyini qeyd edib.
Ayətullah Məkarim Şirazi virtual məkanın mahiyyət etibarilə müstəqil məzmun istehsalçısı olmadığını bildirərək deyib: "Virtual məkanın təqdim etdiyi hər şey ona ötürülən məlumatların əksidir. Buna görə də bu məkanın əsas təminatçılarının kimlər olduğu və hansı məqsədlərlə idarə edildiyi araşdırılmalıdır."
O, virtual məkanla real məkanın fərqləndirilməsi mövzusuna toxunaraq əlavə edib ki, əsas problemlərdən biri virtual məkanda real məzmunla saxta və uydurma məzmunun ayırd edilməsidir. Əgər bu fərqləndirmə mümkün olmazsa, cəmiyyət böyük bir fəlakətlə üz-üzə qala bilər. Bu sahədə həqiqətlə aldadıcı məzmunu ayırd etmək üçün mexanizmlər və ixtisaslaşmış qruplar ciddi şəkildə fəaliyyət göstərməlidir.
Ayətullah Məkarim Şirazi xüsusilə gənclər üçün ictimai maarifləndirmənin vacibliyini vurğulayaraq qeyd edib ki, gənc nəslə xəbərdarlıq edilməlidir: virtual məkanda yayılan bir çox görüntülər, xəbərlər, açıqlamalar və səhnələr reallığı əks etdirmir və şübhə yarandıqda mütəxəssislərə müraciət olunmalıdır.
O bildirib ki, virtual məkan bəzi faydalarına baxmayaraq, mövcud şəraitdə daha çox zərər daşıyır. Bu məkanın əsas qaynaqlarının əcnəbilərin nəzarətində olduğunu deyən Ayətullah qeyd edib ki, buna görə də orada həqiqətin ötürülməsindən daha çox təhrif və manipulyasiya üçün zəmin mövcuddur. Onun sözlərinə görə, ardıcıl səylərlə geriliklər aradan qaldırılmalı, virtual məkanı nəzarətdə saxlamaq, müsbət cəhətlərindən faydalanmaq və zərərlərini məhdudlaşdırmaq mərhələsinə çatmaq lazımdır.
