II Abdullah qeyd edib ki, bölgəni böhranın daha da dərinləşməsindən uzaq tutmağın yeganə yolu dialoq və siyasi həllərdir.
İslamazeri.com xəbər verir ki, İordaniya kralı II Abdullah bildirib ki, ölkəsi hava məkanının pozulmasına yol verməyəcək və İordaniya heç bir halda müharibə meydanına çevrilməyəcək.
Məlumata görə, kral vurğulayıb ki, İordaniyanın təhlükəsizliyi və vətəndaşlarının qorunması hər cür digər mülahizədən üstündür.
II Abdullah qeyd edib ki, bölgəni böhranın daha da dərinləşməsindən uzaq tutmağın yeganə yolu dialoq və siyasi həllərdir.
Kral Fələstin məsələsinə də toxunaraq, çərşənbə axşamı İordaniya Jurnalistlər Birliyinin Şura üzvləri ilə görüşündə bildirib ki, fələstinlilərin hüquqlarının qorunması və İordan çayının qərb sahili ilə Qüdsdə mövcud vəziyyəti dəyişdirməyə yönəlmiş addımların dayandırılması üçün qardaş ölkələr və beynəlxalq tərəfdaşlarla əməkdaşlıq davam etdiriləcək.
O, həmçinin Suriyanın təhlükəsizliyinin, sabitliyinin və ərazi bütövlüyünün qorunması istiqamətində göstərilən səylərin dəstəklənməsinin vacibliyini vurğulayıb.
