ABŞ-da silah istehsalını sürəətləndirmək üçün şirkətlərə 21 gün vaxt verildi
İslamazeri.com xəbər verir ki, ABŞ Hərbi Katibinin müavini Stiv Feynberq ölkənin ən böyük müdafiə şirkətlərinə göndərdiyi məktubda əsas silah sistemlərinin istehsalını və çatdırılmasını sürətləndirmək üçün 21 gün ərzində planlar təqdim etmələrini istəyib.
“The Washington Post” (WP) qəzeti məktubun surətini gördüyünü bildirib.
Məktubda Feynberq bildirib ki, “İllərlə davam edən inkişaf qəbuledilməzdir. Proqramımızın müddətlərini kəskin şəkildə sürətləndirməli və istehsal imkanlarımızı dərhal genişləndirməliyik”.
Məktubda prioritet göstərilən proqramlar arasında qitələrarası ballistik raketləri ələ keçirmək üçün hazırlanmış Növbəti Nəsil Tutma Sistemi, mobil hava hücumundan müdafiə radarları və kosmik raket izləmə sistemi də var idi.
Feynberq həmçinin şirkətlərdən edə biləcəkləri konkret kapital qoyuluşları və istehsal güclərini necə genişləndirəcəkləri barədə məlumat vermələrini, eləcə də “öz töhfələrini verməyə hazır olduqlarını nümayiş etdirmələrini” istəyib.
Qəzetə danışan iki mənbənin sözlərinə görə, direktiv İran-İraq münaqişəsi zamanı ortaya çıxan silah çatışmazlığı ilə bağlı Prezident Donald Tramp və Pentaqon arasında gərginliyin olduğu bir vaxta təsadüf edir.
Müdafiə sənayesi mütəxəssisləri planların həyata keçirilməsinin Konqresin 1,15 trilyon dollarlıq müdafiə büdcəsini təsdiqləməsindən asılı olduğunu bildirirlər. Büdcə hazırda Demokratlarla fikir ayrılıqları səbəbindən Konqresdə dayandırılıb.
WP mənbələrinə görə, Lockheed Martin, Northrop Grumman, Boeing, Anduril və Palantir şirkətlərinin rəhbərləri də iyulun sonunda Ağ Evə dəvət olunublar.
Onlardan müdafiə xərclərinin artırılması üçün qanunvericilərə birbaşa lobbiçilik etmələri xahiş olunub.
Son aylarda Pentaqon Amerikanın əsas müdafiə şirkətləri ilə müxtəlif "çərçivə müqavilələri" elan edib və həm ucuz sursat, həm də qabaqcıl hava hücumundan müdafiə sistemlərinin tədarükünü artırmaq üçün yeni şirkətlərə vəd verib.
Qəzetin məlumatlarına görə, ABŞ təkcə İranla müharibənin ilk ayında 850-dən çox Tomahawk kruiz raketi və 1000-dən çox Patriot və THAAD tutucu raketindən istifadə edib.
Amerika ordusu həmçinin münaqişənin ilk həftələrində 1300-dən çox taktiki ballistik raket atıb.
CNN avqust ayında ABŞ-ın əsas raket ehtiyatlarının İranla beş aylıq müharibə zamanı əhəmiyyətli dərəcədə azaldığını bildirmişdi.
Hərbi rəsmilər xəbərdarlıq etmişdilər ki, bu azalma ABŞ-ın yeni münaqişələrə hazırlığına təsir göstərə bilər. Hesabata görə, ABŞ THAAD raketlərinin təxminən 80 faizindən istifadə edib.
Lakin Tramp Truth Social-dakı paylaşımında ABŞ-ın "çox böyük miqdarda" sursata sahib olduğunu bildirmiş və əlavə etmişdi ki, "çoxlu miqdarda" istehsal olunur və lazım olduqda ABŞ-a çatdırılır.
Bloomberg-in məlumatına görə, Pentaqon əvvəllər Konqresdən tutucu raket ehtiyatlarını doldurmaq üçün 18,2 milyard dollar tələb etmişdi.
Bu məbləğ Konqresin təsdiqi üçün əvvəllər təqdim edilmiş 67 milyard dollarlıq əlavə maliyyələşdirmə paketinin bir hissəsidir.
Mənbələrə görə, ABŞ hərbi administrasiyası ölkənin sursat ehtiyatlarının "təhlükəli dərəcədə aşağı" səviyyəyə düşməsindən narahatdır.
